កិច្ចខិតខំប្រឹងប្រែងដ៏តក់ក្រហល់របស់លោក ត្រាំ ដើម្បីស្នើសុំឲ្យប្រទេសសម្ព័ន្ធមិត្តបញ្ជូននាវាអមនាវាដឹកប្រេងនៅច្រកសមុទ្រ Hormuz បានបញ្ចប់ដោយការខកចិត្តកាលពីថ្ងៃអង្គារ ដែលនាំឱ្យលោករិះគន់យ៉ាងខ្លាំងទៅលើបណ្តាប្រទេសអឺរ៉ុបដែលបានបដិសេធសំណើរបស់លោក។
នៅក្នុងការិយាល័យរាងពងក្រពើនៃសេតវិមាន លោក ត្រាំ មានទឹកមុខមួម៉ៅ ហើយបានថ្លែងថា «យើងមិនត្រូវការជំនួយច្រើនពេកទេ។ តាមពិតទៅ យើងមិនត្រូវការជំនួយអ្វីទាំងអស់»។
នេះជាការផ្លាស់ប្តូរឥរិយាបថដ៏គួរឱ្យភ្ញាក់ផ្អើល បន្ទាប់ពីលោកបានទទូចយ៉ាងខ្លាំងឱ្យប្រទេសផ្សេងទៀតបញ្ជូននាវាចម្បាំងទៅកាន់ច្រកសមុទ្រនោះដើម្បីអមការពារនាវាដឹកប្រេង។ បច្ចុប្បន្ននេះ ប្រទេសអ៊ីរ៉ង់បានបិទផ្លូវទឹកនោះយ៉ាងមានប្រសិទ្ធភាព ធ្វើឱ្យតម្លៃថាមពលពិភពលោកហក់ឡើងខ្ពស់។
លោក ត្រាំ បានចាត់ទុកសំណើរបស់លោកថាជាការសាកល្បងភាពស្មោះត្រង់របស់សម្ព័ន្ធមិត្ត ដោយលើកឡើងថា ការបញ្ជូននាវាចម្បាំងនេះគឺជា «កិច្ចការដ៏តូចតាចបំផុត» សម្រាប់ប្រទេសដែលពឹងផ្អែកលើសហរដ្ឋអាមេរិកសម្រាប់សន្តិសុខរបស់ពួកគេ។ លោកថា ប្រទេសមួយចំនួនបានយល់ព្រម ដែលរួមមាន កាតា អារ៉ាប៊ីសាអូឌីត និងអេមីរ៉ាតអារ៉ាប់រួម។
មេដឹកនាំបរទេសភាគច្រើនបានបដិសេធ ដោយនិយាយថា ពួកគេនឹងមិនចូលរួមក្នុងសង្គ្រាមដែលពួកគេមិនបានបង្កឡើងនោះទេ។ ហើយនៅត្រឹមថ្ងៃអង្គារ លោក ត្រាំ បានប្រកាសថា ប្រទេសភាគច្រើនដែលស្ថិតនៅក្រោមអង្គការសន្ធិសញ្ញាអាត្លង់ទិកខាងជើង ឬ NATO បានបរាជ័យក្នុងការបំពេញតួនាទីរបស់ខ្លួន។
លោកនិយាយថា៖ «ខ្ញុំគិតថា NATO កំពុងធ្វើខុសយ៉ាងខ្លាំង ហើយខ្ញុំបាននិយាយជាយូរមកហើយថា ខ្ញុំឆ្ងល់ថាតើ NATO នឹងនៅក្បែរយើងដែរឬទេ។ នេះគឺជាការសាកល្បងដ៏អស្ចារ្យមួយ ព្រោះយើងមិនត្រូវការពួកគេទេ ប៉ុន្តែពួកគេគួរតែនៅទីនោះ»។
សារព័ត៌មាន CNN បានចុះផ្សាយថា លោក ត្រាំ មិនបានចំណាយពេលច្រើនក្នុងការកសាងសម្ព័ន្ធភាពជាមួយ NATO ទេ ពោលគឺបានធ្វើត្រឹមតែពីរបីថ្ងៃប៉ុណ្ណោះ។ លោកមិនបានស្វែងរកការយល់ព្រមពីប្រទេសផ្សេងទៀតក្រៅពីអ៊ីស្រាអែលនោះទេ មុនពេលចាប់ផ្តើមសង្គ្រាមនៅចុងខែកុម្ភៈ។ មេដឹកនាំជាច្រើននៅអឺរ៉ុប និងឈូងសមុទ្រពែរ្ស បាននិយាយថា ពួកគេមានការភ្ញាក់ផ្អើលយ៉ាងខ្លាំងនៅពេលដែលការវាយប្រហារដំបូងបានចាប់ផ្តើម។
CNN ចុះផ្សាយថា កំហឹងរបស់លោក ត្រាំ ប្រហែលជាជះឥទ្ធិពលទៅលើសង្គ្រាមអ៊ុយក្រែននិងរុស្ស៊ី ដោយសារតែលោក ត្រាំ ធ្លាប់បានលើកឡើងម្តងហើយម្តងទៀតថា វាបានផ្តល់ផលប្រយោជន៍ដល់អឺរ៉ុបច្រើនជាងផលប្រយោជន៍សម្រាប់អាមេរិក។
លោក ត្រាំ និយាយថា៖ «យើងជួយពួកគេ ហើយពួកគេមិនបានជួយយើងទេ ហើយខ្ញុំគិតថា នោះគឺជារឿងដ៏អាក្រក់បំផុតសម្រាប់ NATO»។
កន្លងមក លោក ត្រាំ ធ្លាប់បានបង្ហើបជាចំហអំពីការដកការគាំទ្រពី NATO ប៉ុន្តែ ក្នុងរយៈពេលប៉ុន្មានខែថ្មីៗនេះ លោកហាក់ដូចជាមានភាពវិជ្ជមានចំពោះសម្ព័ន្ធភាពនេះ បន្ទាប់ពីប្រទេសសមាជិកបានយល់ព្រមបង្កើនការចំណាយលើវិស័យការពារជាតិ៕cnn
