កំណើនបរិមាណកុងតឺន័រ និងបរិមាណទំនិញឆ្លងកាត់កាលពីឆ្នាំ២០២៥ បានជួយឱ្យកំពង់ផែស្វយ័តក្រុងព្រះសីហនុ(កសស) រកប្រាក់ចំណេញបានប្រមាណជិត ៤៣ លានដុល្លារ កើនឡើងជាង ៣៥% បើធៀបនឹងឆ្នាំ២០២៤។ ជាមួយនឹងកំណើនចរាចរណ៍នាវាឆ្លងកាត់ បច្ចុប្បន្នការអភិវឌ្ឍ និងពង្រីកសមត្ថភាពនៅទីនោះក៏ត្រូវបានធ្វើឡើងជាបន្តបន្ទាប់ផងដែរ។
របាយការណ៍ហិរញ្ញវត្ថុរបស់ កសស ចេញផ្សាយកាលពីថ្ងៃទី១៨ ខែមីនា បង្ហាញថា ក្នុងឆ្នាំ២០២៥ កំពង់ផែស្វយ័តក្រុងព្រះសីហនុរកចំណូលបានសរុប ៦២១ ៤៥៨ ៥៤៦ ពាន់រៀល (ប្រហែល ១៥៥,៣៦ លានដុល្លារអាមេរិក) កើនឡើង ៣៥,៣៣% បើធៀបនឹងឆ្នាំ២០២៤។ បន្ទាប់ពីដកការចំណាយប្រតិបត្តិការផ្សេងៗ និងប្រាក់បង់ពន្ធ បានធ្វើឱ្យ កសស នៅសល់ប្រាក់ចំណេញសរុប ១៧១ ៩៧៨ ៩៤៧ ពាន់លានរៀល(៤២,៩៩ លានដុល្លារអាមេរិក) កើនឡើង ៣៥,៧% ធៀបនឹងឆ្នាំ២០២៤ ដែលមានប្រមាណ ១២៦ ៧៣៣ ៦២៩ ពាន់លានរៀល(៣១,៦៨ លានដុល្លារ)។
របាយការណ៍បញ្ជាក់ថា៖«មូលហេតុចម្បងនៃការកើនឡើងចំណូល ចំណេញប្រតិបត្តិការ និងចំណេញសុទ្ធ គឺបណ្ដាលមកពីបរិមាណកុងតឺន័រ និងបរិមាណទំនិញឆ្លងកាត់ កសស មានការកើនឡើងបើប្រៀបធៀបទៅនឹងឆ្នាំ២០២៤»។
ជាទូទៅប្រភពចំណូលសំខាន់ៗរបស់កំពង់ផែស្វយ័តក្រុងព្រះសីហនុ រួមមាន ចំណូលពីការលើកដាក់ពីនាវាទៅទីលាន, ចំណូលលើកដាក់លើទីលាន, ចំណូលពីសេវាកម្មនាវាចរ, ចំណូលស្តុក ឃ្លាំង និងទីលាន, ចំណូលដឹកជញ្ជូន, ចំណូលនាវាទេសចរណ៍, ចំណូលពីតំបន់សេដ្ឋកិច្ចពិសេស, ចំណូលជួលទីតាំង, និងចំណូលផ្សេងៗទៀត។
ប្រធានអគ្គនាយកកំពង់ផែស្វយ័តក្រុងព្រះសីហនុ លោក លូ គឹមឈន់ កាលពីដើមឆ្នាំ២០២៦ បាននិយាយថា កម្ពុជាមានមោទនភាពដែលមានកំពង់ផែស្វយ័តក្រុងព្រះសីហនុដើរតួនាទីជាច្រកទ្វារនាំទំនិញចេញ-ចូលដ៏សំខាន់ និងឯករាជ្យ ដែលអាចជួយដោះស្រាយបញ្ហាប្រឈម ជំរុញកំណើនសេដ្ឋកិច្ចជាតិ និងកំពុងអភិវឌ្ឍខ្លួនជាបណ្តើរៗស្របតាមចក្ខុវិស័យ និងគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែតំបន់ និងមជ្ឈមណ្ឌលឡូជីស្ទិក ដែលមិនត្រឹមតែសម្រាប់ប្រទេសកម្ពុជាប៉ុណ្ណោះទេ គឺសម្រាប់តំបន់ទន្លេមេគង្គ និងលើសពីនេះទៀត ជាទស្សនវិស័យដ៏ឈ្លាសវៃបំផុតរបស់រាជរដ្ឋាភិបាលកម្ពុជា និងទទួលបានការគាំទ្រពីរដ្ឋាភិបាលជប៉ុនផងដែរ។
លោកបញ្ជាក់ថា៖«កសស ប្តេជ្ញាចូលរួមជាមួយរាជរដ្ឋាភិបាលកម្ពុជាឆ្ពោះទៅសម្រេចបានចក្ខុវិស័យនាឆ្នាំ២០៥០ ក្នុងការប្រែក្លាយជាប្រទេសដែលមានចំណូលខ្ពស់ តាមរយៈការពង្រឹងគុណភាពសេវាកម្ម ការប្រើប្រាស់បរិវត្តកម្មឌីជីថល និងជំរុញការតភ្ជាប់»៕
