តំណាងធនាគារពិភពលោក(WB) បាននិយាយថា ធនាគារពិភពលោកបានត្រៀមខ្លួនរួចជាស្រេចក្នុងការបន្តកិច្ចសហប្រតិបត្តិការ តាមរយៈការផ្តល់ជំនួយបច្ចេកទេស និងចែករំលែកបទពិសោធអន្តរជាតិថ្មីៗ ដើម្បីជួយកម្ពុជាឱ្យឆ្ពោះទៅសម្រេចបានចក្ខុវិស័យក្នុងការក្លាយជាប្រទេសមានប្រាក់ចំណូលខ្ពស់នៅឆ្នាំ២០៥០។
នេះជាការអះអាងរបស់លោក Carlos Felipe Jaramillo អនុប្រធានធនាគារពិភពលោក ទទួលបន្ទុកតំបន់អាស៊ីខាងកើត និងប៉ាស៊ីហ្វិក នាជំនួបពិភាក្សាជាមួយ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីរសៀលថ្ងៃទី១៦ ខែមីនា ឆ្នាំ២០២៦។
នៅក្នុងដំណើរបេសកកម្មមកកាន់ប្រទេសកម្ពុជា លោក Carlos Felipe Jaramillo បានប្រាប់ថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុថា ធនាគារពិភពលោកមានការប្តេជ្ញាចិត្តខ្ពស់ក្នុងការបន្តកិច្ចសហប្រតិបត្តិការ និងគាំទ្រដល់កម្ពុជាដើម្បីរួមចំណែកក្នុងដំណើរឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ តាមរយៈក្របខ័ណ្ឌថ្មីនៃកិច្ចសហប្រតិបត្តិការភាពជាដៃគូរវាងរាជរដ្ឋាភិបាលកម្ពុជា ជាមួយធនាគារពិភពលោកឆ្នាំ២០២៥-២០២៩ (Country Partnership Framework - CPF 2025-2029)។ កិច្ចសហប្រតិបត្តិការនេះកំពុងផ្តោតលើ ១.ការអភិវឌ្ឍមូលធនមនុស្ស, ២.ការពង្រីកភាពប្រកួតប្រជែងសម្រាប់ការងារល្អប្រសើរ និង ៣.ការពង្រឹងភាពធន់សម្រាប់ប្រជាជនងាយរងគ្រោះ។
លោកបានបន្ថែមថា ឯកសារ CPF 2025-2029 ត្រូវបានអនុម័តជាផ្លូវការពីក្រុមប្រឹក្សាភិបាលនាយកប្រតិបត្តិនៃធនាគារពិភពលោក ក្រោមកិច្ចសហការរៀបចំយ៉ាងជិតស្និទ្ធជាមួយក្រសួង-ស្ថាប័នរបស់រាជរដ្ឋាភិបាលកម្ពុជា ព្រមទាំងបណ្តាភាគីពាក់ព័ន្ធដទៃទៀត ស្របតាមយុទ្ធសាស្ត្របញ្ចកោណ ដំណាក់កាលទី១, ផែនការយុទ្ធសាស្ត្រអភិវឌ្ឍន៍ជាតិ, និងតម្រូវការជាអាទិភាពរបស់កម្ពុជា។
លោកបាននិយាយថា៖«ធនាគារពិភពលោកបានត្រៀមខ្លួនរួចជាស្រេចក្នុងការបន្តកិច្ចសហប្រតិបត្តិការ ការផ្តល់ជំនួយបច្ចេកទេស និងចែករំលែកបទពិសោធអន្តរជាតិ ដើម្បីគាំទ្រកម្ពុជាក្នុងការកែលម្អគោលនយោបាយ និងសមត្ថភាពស្ថាប័ន និងគាំទ្រដល់កម្ពុជាក្នុងការអភិវឌ្ឍលើរាល់ការដ្ឋានការងារអាទិភាពដែលជាកត្តាចាំបាច់សម្រាប់ឈានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០»។
បន្ថែមលើនេះ លោក Carlos Felipe Jaramillo ក៏បានលើកឡើងអំពីក្របខ័ណ្ឌកញ្ចប់ថវិកា «International Development Association (IDA21)» ដោយធនាគារពិភពលោកនឹងបន្តការជួយគាំទ្រកម្ពុជា តាមរយៈការខិតខំប្រឹងប្រែងរក្សាទំហំហិរញ្ញប្បទានដែលមាន និងកៀរគរហិរញ្ញប្បទានពីប្រភពផ្សេងៗបន្ថែមទៀត។
ជាការឆ្លើយតប លោក អូន ព័ន្ធមុនីរ័ត្ន បានសម្តែងក្តីសោមនស្សរីករាយ និងបានថ្លែងអំណរគុណចំពោះកិច្ចសហប្រតិបត្តិការដ៏ល្អដែលធនាគារពិភពលោកតែងតែគាំទ្រ និងរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា។ បន្ថែមលើនេះ លោកក៏ប្រាប់គណៈប្រតិភូធនាគារពិភពលោកអំពីស្ថានភាពម៉ាក្រូសេដ្ឋកិច្ចនៅកម្ពុជា និងបញ្ហាប្រឈមសំខាន់ៗដែលកម្ពុជាកំពុងជួបប្រទះដូចជា ផលអវិជ្ជមានដែលបណ្តាលមកពីភាពមិនប្រាកដប្រជានៃសេដ្ឋកិច្ចសកល, ការផ្លាស់ប្តូរគោលនយោបាយពាណិជ្ជកម្ម, ផលប៉ះពាល់ពីភាពតានតឹងភូមិសាស្ត្រនយោបាយ, សង្គ្រាមនៅព្រំដែនកម្ពុជា-ថៃ, និងការកើនឡើងតម្លៃប្រេងដោយសារសង្គ្រាមនៅតំបន់មជ្ឈិមបូព៌ា ជាដើម។
ជាមួយគ្នានេះ លោកឧបនាយករដ្ឋមន្ត្រីក៏បានរំលេចឡើងអំពីទិសដៅការងារក្នុងវិស័យអាទិភាពមួយចំនួនដែលរាជរដ្ឋាភិបាលកម្ពុជាកំពុងធ្វើមានដូចជា៖ វិស័យអភិវឌ្ឍន៍ជំនាញ និងអប់រំ, វិស័យដឹកជញ្ជូន, និងវិស័យអាទិភាពផ្សេងៗទៀតដែលធ្វើឱ្យប្រសើរឡើងនូវបរិយាកាសវិនិយោគ និងកិច្ចសម្រួលពាណិជ្ជកម្មដើម្បីលើកកម្ពស់ភាពប្រកួតប្រជែងផលិតភាព និងពិពិធកម្មសេដ្ឋកិច្ច ព្រមទាំងដើម្បីអាចទាញយកប្រយោជន៍ជាអតិបរមាពីកិច្ចព្រមព្រៀងពាណិជ្ជកម្មសេរីនានាដែលកម្ពុជាបានចុះហត្ថលេខានាពេលកន្លងមក៕
