ក្រសួងមួយចំនួន បានចាប់ផ្តើមពង្រឹងវិធានការ ដើម្បីកាត់បន្ថយ និងសន្សំសំចៃថាមពលអគ្គិសនី ដោយបានណែនាំឱ្យថ្នាក់ដឹកនាំ និងមន្រ្តីរាជការនៅតាមស្ថាប័ន និងអង្គភាព ស្ថិតក្រោមឱវាទ របស់ខ្លួន ចូលរួមអនុវត្តនូវវិធាននេះឱ្យមានប្រសិទ្ធភាព ក្នុងអំឡុងពេលបំពេញការងារ ដើម្បីធានាបាននូវការសន្សំសំចៃថាមពលអគ្គិសនី។
សេចក្ដីណែនាំ ស្តីពីការពង្រឹងវិធានការ ដើម្បីកាត់បន្ថយ និងសន្សំសំចៃថាមពលអគ្គិសនីនេះ ត្រូវបានធ្វើឡើង ស្របពេលដែលអាកាសធាតុនាពេលបច្ចុប្បន្ន មានការឡើងកម្ដៅ ធ្វើឱ្យតម្រូវការការប្រើប្រាស់ថាមពលអគ្គិសនី ក៏មានការកើនឡើងខ្លាំង ខណៈដែលតម្លៃប្រេងឥន្ធនៈមានការកើនឡើងជាបន្តបន្ទាប់ដូចគ្នា។
ក្រសួងទេសចរណ៍ ទើបតែបានចេញសេចក្ដីណែនាំនេះ កាលពីថ្ងៃទី ១៧ ខែមីនា ដោយកំណត់ឱ្យថ្នាក់ដឹកនាំ និងមន្ដ្រីរាជការនៃក្រសួងទេសចរណ៍ទាំងអស់ ចូលរួមកាត់បន្ថយ និងសន្សំសំចៃថាមពលអគ្គិសនី នៅទីស្ដីការក្រសួងទេសចរណ៍ និងនៅមន្ទីរទេសចរណ៍រាជធានី ខេត្ត ក្នុងអំឡុងពេលបំពេញការងារ ដោយត្រូវអនុវត្តនូវវិធានការចំនួន៣ ដែលបានដាក់ចេញ ចាប់ពីពេលនេះទៅ។
វិធានការទី១ កំណត់ការប្រើប្រាស់ម៉ាស៊ីនត្រជាក់ ដោយក្រសួងទេសចរណ៍ កំណត់ឱ្យប្រើសីតុណ្ហភាពត្រឹម ២៥ °C (កម្រិតស្តង់ដាសន្សំសំចៃ), បិទម៉ាស៊ីនត្រជាក់ក្នុងបន្ទប់ប្រជុំ ក្រោយពីបញ្ចប់ការប្រើប្រាស់, បិទម៉ាស៊ីនត្រជាក់ ១៥ ទៅ ៣០ នាទី មុនពេលសម្រាក ឬមុនពេលបញ្ចប់ម៉ោងការងារ។
វិធានការទី២ កំណត់ការប្រើប្រាស់ប្រព័ន្ធពន្លឺ ដោយក្រសួងតម្រូវឱ្យបិទអំពូលភ្លើងនៅតាមកន្លែងដែលមិនចាំបាច់ ឬកន្លែងដែលមានពន្លឺគ្រប់គ្រាន់, បិទអំពូលភ្លើងក្នុងបន្ទប់ធ្វើការរាល់ពេលចេញទៅខាងក្រៅលើសពី ១៥ នាទី, បិទអំពូលភ្លើងក្នុងបន្ទប់ទឹក ក្រោយពីប្រើប្រាស់រួច, ជំរុញការប្រើប្រាស់ពន្លឺធម្មជាតិដោយបើកវាំងនន ដើម្បីឱ្យពន្លឺថ្ងៃចូលក្នុងបន្ទប់គ្រប់គ្រាន់ ជំនួសឱ្យការបើកអំពូលភ្លើង។
ចំណែកវិធានការទី៣ គឺកំណត់ការប្រើប្រាស់សម្ភារការិយាល័យ ដោយត្រូវបិទកុំព្យូទ័រ (Shut down) និងដកខ្សែភ្លើងឧបករណ៍ផ្សេងៗនៅពេលបញ្ចប់ការងារប្រចាំថ្ងៃ និងកំណត់ឱ្យកុំព្យូទ័រស្ថិតក្នុងទម្រង់ "Sleep Mode" នៅពេលសម្រាក ហើយក្រសួង បានបញ្ជាក់ទៅថ្នាក់ដឹកនាំ និងមន្ត្រីរាជការនៃក្រសួងទេសចរណ៍ទាំងអស់ ត្រូវអនុវត្តវិធានការទាំងនេះឱ្យមានប្រសិទ្ធភាព ប្រកបដោយស្មារតីទទួលខុសត្រូវខ្ពស់ ចាប់ពីថ្ងៃចុះហត្ថលេខានេះតទៅ។
ដោយឡែកក្រសួងការងារ និងបណ្ដុះបណ្តាលវជ្ជាជីវៈ ក៏បានសេចក្ដីណែនាំបន្ថែម ស្តីពីការចូលរួមសន្សំសំចៃការប្រើប្រាស់ថាមពលអគ្គិសនីនេះដែរ ដោយថ្នាក់ដឹកនាំ និងមន្រ្តីរាជការចំណុះឱ្យក្រសួងមួយនេះ ត្រូវអនុវត្តទៅតាមវិធានការចំនួន៥ ទី១ ត្រូវកំណត់សីតុណ្ហភាពម៉ាស៊ីនត្រជាក់ក្នុងបន្ទប់ការិយាល័យ សាលប្រជុំនានា ឬបន្ទប់សិក្សា ត្រឹមឬ លើសពី ២៥អង្សាសេ ចៀសវាងប្រើប្រាស់ម៉ាស៊ីនត្រជាក់លើសពីតម្រូវការ។
ចំណែកទី២ ត្រូវបិទអំពូលភ្លើង ម៉ាស៊ីនត្រជាក់ និងដកឌុយចេញពីឧបករណ៍បរិក្ខារអគ្គិសនីគ្រប់ប្រភេទដែលមិនចាំបាច់ ឬនៅពេលឈប់ប្រើប្រាស់ នៅពេលម៉ោងសម្រាក និងមុនពេលចាកចេញពីបន្ទប់ ការិយាល័យ សាលប្រជុំ ឬបន្ទប់សិក្សា។ ទី៣ ចំពោះការបំភ្លឺទីសាធារណៈ ឬតាមរបង ត្រូវកំណត់ពេលបើក-បិទ ឱ្យបានត្រឹមត្រូវ និងខ្ជាប់ខ្ជួន ចៀសវាងបំភ្លឺពេលមិនទាន់ងងឹត និងបើកចោលពេលព្រឹក នៅពេលមានពន្លឺថ្ងៃ។
ចំពោះវិធានការទី៤ ក្រសួងបានលើកទឹកចិត្តឱ្យបើកវាំងននប្រើប្រាស់ពន្លឺព្រះអាទិត្យឱ្យអស់លទ្ធភាព ជំនួសការបើកអំពូលភ្លើង និងទី៥ ត្រូវបិទសេចក្ដីណែនាំបន្ថែមនេះ នៅតាមទីតាំងដាក់ឧបករណ៍អគ្គិសនីប្រើប្រាស់ ហើយថ្នាក់ដឹកនាំ និងមន្ត្រីរាជការរបស់ក្រសួងការងារទាំងអស់ ត្រូវយកចិត្តទុកដាក់អនុវត្តវិធានទាំងនេះឱ្យមានប្រសិទ្ធភាពខ្ពស់ចាប់ពីថ្ងៃចុះហត្ថលេខាតទៅ។
ក្រសួងបានបញ្ជាក់ថា៖ «ដើម្បីចូលរួមសន្សំសំចៃការប្រើប្រាស់ថាមពលអគ្គិសនី ក្នុងស្ថានភាពដែលពិភពលោកកំពុងប្រឈមនឹងវិបត្តិផ្គត់ផ្គង់ និងការកើនឡើងថ្លៃប្រេងឥន្ធនៈជាបន្តបន្ទាប់ក្នុងអំឡុងពេលនៃសភាពការណ៍ជម្លោះនៅតំបន់ មជ្ឈិមបូព៌ា ក្រសួងសូមធ្វើការណែនាំបន្ថែមដល់ថ្នាក់ដឹកនាំ និងមន្ត្រីរាជការទាំងអស់ ដែលកំពុងបម្រើការងារនៅតាមបណ្តាគ្រប់អង្គភាពក្រោមឱវាទក្រសួង ត្រូវរួមគ្នាចូលរួមសន្សំសំចៃការប្រើប្រាស់ថាមពលអគ្គិសនី ទៅតាមវិធានការ (ដែលបានដាក់ចេញទាំងអស់នេះ)»៕
