ក្រុមហ៊ុនធំៗមកពីប្រទេសអូទ្រីសចំនួន ១៩ បានបង្ហាញការចាប់អារម្មណ៍ខ្ពស់ក្នុងការស្វែងរកឱកាសវិនិយោគ និងកសាងភាពជាដៃគូយូរអង្វែងជាមួយកម្ពុជា ខណៈកម្ពុជាជាប្រទេសដែលមានច្បាប់វិនិយោគល្អប្រសើរ និងមានកត្តារួមផ្សំជាច្រើនទៀតដែលផ្តល់ផលវិជ្ជមានទៅដល់វិនិយោគិន។
ចំណាប់អារម្មណ៍ទាំងអស់នេះ ត្រូវបានបង្ហាញនៅក្នុងវេទិកាធុរកិច្ចកម្ពុជា-អូទ្រីស ដែលរៀបចំធ្វើនៅទីស្នាក់ការរបស់ CDC នាព្រឹកថ្ងៃទី១៧ ខែមីនា ឆ្នាំ២០២៦។ វេទិកានេះមានការចូលរួមពី លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ព្រមទាំងការចូលរួមពីសំណាក់គណៈប្រតិភូក្រុមហ៊ុនអូទ្រីសធំៗចំនួន ១៩ ដែលដឹកនាំដោយ លោក Andreas Sumper អនុប្រធានបេសកកម្មនៃស្ថានទូតអូទ្រីសប្រចាំព្រះរាជាណាចក្រកម្ពុជា។
វេទិកានេះក៏មានការចូលរួមផងដែរពីតំណាងក្រសួងការបរទេសនិងសហប្រតិបត្តិការអន្តរជាតិ, ក្រសួងសេដ្ឋកិច្ចនិងហិរញ្ញវត្ថុ, ក្រសួងពាណិជ្ជកម្ម, ក្រសួងសាធារណការនិងដឹកជញ្ជូន, ក្រសួងធនធានទឹកនិងឧតុនិយម, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, ក្រសួងកសិកម្ម រុក្ខាប្រមាញ់ និងនេសាទ, ក្រសួងអប់រំយុវជននិងកីឡា, សមាគមឧកញ៉ាកម្ពុជា, និងសភាពាណិជ្ជកម្មកម្ពុជា។
យោងតាម CDC វេទិកាធុរកិច្ចកម្ពុជា-អូទ្រីស គឺជាផ្នែកមួយដ៏សំខាន់នៃបេសកកម្មពាណិជ្ជកម្មធំបំផុតមិនធ្លាប់មានពីមុនមករបស់គណៈប្រតិភូក្រុមហ៊ុនអូទ្រីសនៅក្នុងប្រទេសកម្ពុជា។ វេទិកានេះត្រូវបានរៀបចំឡើងឱ្យមានលក្ខណៈយុទ្ធសាស្ត្រដែលអនុញ្ញាតឱ្យវិនិយោគិនអូទ្រីសមានឱកាសទទួលបាននូវការឈ្វេងយល់ស៊ីជម្រៅអំពីបរិយាកាសវិនិយោគ បរិបទទីផ្សារនៅកម្ពុជា និងការផ្លាស់ប្តូរយោបល់កម្រិតខ្ពស់ជាមួយបណ្តាក្រសួង-ស្ថាប័នពាក់ព័ន្ធដោយយកចិត្តទុកដាក់ ហើយរំពឹងថាវានឹងក្លាយជាមូលដ្ឋានគ្រឹះនៃការបង្កើតទំនាក់ទំនងធុរកិច្ចថ្មីៗនៅកម្ពុជា។
អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល បានប្រាប់គណៈប្រតិភូក្រុមហ៊ុនអូទ្រីសថា កម្ពុជាគឺជាគោលដៅវិនិយោគមួយក្នុងចំណោមគោលដៅដែលមានថាមវន្ត និងចក្ខុវិស័យវែងឆ្ងាយនៅក្នុងតំបន់អាស៊ីអាគ្នេយ៍។ ជាមួយនឹងច្បាប់វិនិយោគដែលមានអំណោយផលខ្ពស់, ការយកចិត្តទុកដាក់ពីសំណាក់រដ្ឋាភិបាលចំពោះផ្នែកឯកជន, លំនឹងម៉ាក្រូសេដ្ឋកិច្ច, កម្លាំងពលកម្មវ័យក្មេង, ហេដ្ឋារចនាសម្ព័ន្ធប្រទាក់ក្រឡាដែលបានកំពុងអភិវឌ្ឍយ៉ាងសកម្ម, ព្រមទាំងការប្តេជ្ញាចិត្តយ៉ាងមោះមុតរបស់រាជរដ្ឋាភិបាលចំពោះការបោសសម្អាតបទល្មើសឆបោកតាមប្រព័ន្ធអនឡាញ (Online Scams) ដែលសិទ្ធសឹងជាកត្តាសំខាន់ក្នុងការបង្កើតនូវបរិយាកាសដ៏ទាក់ទាញសម្រាប់ការស្វែងរកឱកាសវិនិយោគដោយផ្ទាល់ពីវិនិយោគិនបរទេស។
ជាការឆ្លើយតប តំណាងគណៈប្រតិភូក្រុមហ៊ុនអូទ្រីស បានអំណរគុណយ៉ាងជ្រាលជ្រៅចំពោះថ្នាក់ដឹកនាំ CDC និងផ្នែកឯកជនកម្ពុជាសម្រាប់កិច្ចសហការដ៏ល្អប្រសើរ និងការគាំទ្រយ៉ាងកក់ក្តៅក្នុងការបេសកកម្មនេះ។
CDC បានបញ្ជាក់ថា៖«វេទិកាធុរកិច្ចនេះ ត្រូវបានរំពឹងថានឹងក្លាយជាបោះជំហានដ៏សំខាន់មួយក្នុងការផ្លាស់ប្តូរពីការពិភាក្សា ទៅជាការបង្កើតនូវទំនាក់ទំនងធុរកិច្ចទ្វេភាគី (B2B) យ៉ាងពិតប្រាកដ។ តាមរយៈកិច្ចសហការយ៉ាងជិតស្និទ្ធរវាងក្រុមប្រឹក្សាអភិវឌ្ឍន៍កម្ពុជា និងស្ថានទូតអូទ្រីស ភាគីទាំងពីរមានទំនុកចិត្តថានឹងមានវត្តមានរបស់ក្រុមហ៊ុនអូទ្រីសនៅកម្ពុជាបន្ថែមមួយកម្រិតទៀត ដែលនឹងរួមចំណែកយ៉ាងសំខាន់ដល់ការធ្វើទំនើបកម្មឧស្សាហកម្ម និងការជំរុញកំណើនសេដ្ឋកិច្ចកម្ពុជា ប្រកបដោយបរិយាបន្ន និងចីរភាព។
កាលពីថ្ងៃទី៤ ខែមីនា ឆ្នាំ២០២៦ នៅក្នុងជំនួបជាមួយលោក ហ៊ុន សែន ប្រធានព្រឹទ្ធសភាកម្ពុជា លោកស្រី Katharina Wieser ឯកអគ្គរដ្ឋទូតថ្មីរបស់ប្រទេសអូទ្រីសប្រចាំនៅកម្ពុជា ធ្លាប់បានសន្យាថា នឹងខិតខំជំរុញទំនាក់ទំនង និងកិច្ចសហប្រតិបត្តិការបន្ថែមទៀតរវាងកម្ពុជា និងអូទ្រីស ជាពិសេសវិស័យពាណិជ្ជកម្ម និងវិនិយោគ។ លោកស្រីអះអាងថា នៅពេលខាងមុខនឹងមានធុរជនអូទ្រីស ជាង ១០ក្រុមហ៊ុនធ្វើដំណើរមកប្រទេសកម្ពុជា ដើម្បីស្វែងរកឱកាសក្នុងការវិនិយោគផ្ទាល់ ឬចាប់ដៃគូជាមួយវិនិយោគិនក្នុងស្រុក។
សមាជិកសភាពាណិជ្ជកម្មកម្ពុជា លោក សំ សុខនឿន ដែលចូលរួមផ្ទាល់ក្នុងវេទិកាធុរកិច្ចកម្ពុជា-អូទ្រីស បានប្រាប់ភ្នំពេញប៉ុស្តិ៍ក្នុងថ្ងៃទី១៧ ខែមីនាថា ថ្នាក់ដឹកនាំក្រុមហ៊ុនធំៗទាំង ១៩ មកពីប្រទេសអូទ្រីសពិតជាបង្ហាញចំណាប់អារម្មណ៍ចំពោះឱកាសចូលមកវិនិយោគផ្ទាល់នៅកម្ពុជា ព្រោះកម្ពុជាមានច្បាប់វិនិយោគអំណោយផល និងមានកត្តារួមផ្សំជាច្រើនទៀត។ បច្ចុប្បន្នកម្ពុជាក៏ជាទីតាំងសម្រាប់ការវិនិយោគផ្ទាល់ពីបរទេសល្អជាងគេផងដែរនៅក្នុងតំបន់អាស៊ាន។
លោកបានថ្លែងថា៖«ខ្ញុំមានសុទិដ្ឋិនិយមថា នៅពេលខាងមុខឆាប់ៗនេះនឹងមានក្រុមហ៊ុនមកពីប្រទេសអូទ្រីសចូលមកវិនិយោគផ្ទាល់នៅកម្ពុជា»
បើតាមលោក សុខនឿន ក្រុមហ៊ុនធំៗទាំងនោះមានមកពីវិស័យចម្រុះជាច្រើន ដូចជា វិស័យសំណង់ សាងសង់ផ្លូវដែក សេវាកម្ម និងរោងចក្រផលិតគ្រឿងបច្ចេកវិទ្យា ជាដើម៕
