ក្រុមហ៊ុនមកពីប្រទេសម៉ាឡេស៊ី QL Resources Berhad បានបង្ហាញពីចំណាប់អារម្មណ៍ក្នុងការប្រមូលទិញពោតក្រៀមកម្ពុជាទៅកាន់ទីផ្សារម៉ាឡេស៊ី ព្រមទាំងបង្ហាញពីគោលបំណងក្នុងការវិនិយោគលើកសិដ្ឋានចិញ្ចឹមបសុបក្សីសមាហរណកម្មបែបទំនើប (Integrated Poultry Farming) ដែលនឹងប្រើប្រាស់បច្ចេកវិទ្យាខ្ពស់ស្របតាមស្តង់ដារអន្តរជាតិ។
ព័ត៌មាននេះត្រូវបានតំណាងក្រុមហ៊ុន QL Resources Berhad លោក Chia Seong Pow លើកឡើងក្នុងជំនួបពិភាក្សាជាមួយ លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម នៅទីស្តីការក្រសួងពាណិជ្ជកម្ម កាលពីសប្តាហ៍កន្លងមក។ គោលបំណងនៃជំនួបនេះគឺដើម្បីពិភាក្សាពីកិច្ចសហប្រតិបត្តិការជំរុញវិស័យកសិ-ឧស្សាហកម្ម និងការពង្រីកទីផ្សារនាំចេញផលិតផលកម្ពុជាទៅកាន់ទីផ្សារក្នុងតំបន់។ ជំនួបនេះក៏មានការចូលរួមពីលោក Tan Khee Meng ប្រធានសភាពាណិជ្ជកម្មម៉ាឡេស៊ីនៅកម្ពុជា(MBCC)ផងដែរ។
ជាកិច្ចចាប់ផ្តើមនៃជំនួបនេះ លោក Chia Seong Pow បានប្រាប់ថា ក្រុមហ៊ុនរបស់លោកកំពុងចាប់អារម្មណ៍ក្នុងការបង្កើតក្រុមហ៊ុនពាណិជ្ជកម្មនៅកម្ពុជា ដើម្បីប្រមូលទិញ និងនាំចេញពោតក្រៀមពីកម្ពុជាទៅកាន់ទីផ្សារម៉ាឡេស៊ី។
លោកបន្តថា៖«បន្ថែមលើនេះក្រុមហ៊ុនក៏មានបំណងក្នុងការវិនិយោគលើកសិដ្ឋានចិញ្ចឹមបសុបក្សីសមាហរណកម្មបែបទំនើប (Integrated Poultry Farming) ដែលនឹងប្រើប្រាស់បច្ចេកវិទ្យាខ្ពស់ស្របតាមស្តង់ដារឧស្សាហកម្ម ដើម្បីពង្រឹងសមត្ថភាពផលិតកម្មនៅកម្ពុជាផងដែរ»។
ជាការឆ្លើយតបលោក សំហេង បូរ៉ា បានអះអាងថា ក្រសួងពាណិជ្ជកម្មបានត្រៀមខ្លួនរួចជាស្រេចក្នុងការជួយគាំទ្រ និងសម្របសម្រួលដល់ក្រុមហ៊ុនចំពោះគម្រោងវិនិយោគ និងការបង្កើតក្រុមហ៊ុនពាណិជ្ជកម្មខាងលើ។ ក្នុងនាមក្រសួងពាណិជ្ជកម្មលោកសូមលើកទឹកចិត្តឱ្យភាគីក្រុមហ៊ុនពិនិត្យលទ្ធភាពក្នុងការនាំយកផលិតផលសក្តានុពលរបស់កម្ពុជា ជាពិសេសការជំរុញនាំចេញគ្រាប់ស្វាយចន្ទី ដើម្បីដាក់លក់ក្នុងបណ្តាញទីផ្សារប្រទេសម៉ាឡេស៊ីឱ្យបានច្រើននាពេលខាងមុខ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ២០២៥ ការផ្លាស់ប្តូរទំនិញរវាងប្រទេសកម្ពុជា និងម៉ាឡេស៊ី មានទឹកប្រាក់សរុប ១,០៨ ពាន់លានដុល្លារ កើនឡើង ២៤,៧% បើធៀបឆ្នាំ២០២៤ ដោយទំនិញម៉ាឡេស៊ីនាំចូល ៩៣៥,៣៣ លានដុល្លារ កើន ៣០,៣% ចំណែកកម្ពុជានាំទៅម៉ាឡេស៊ី ១៤៣,៧៦ លានដុល្លារ ថយចុះ ២,៦%។ ម៉ាឡេស៊ី គឺជាដៃគូពាណិជ្ជកម្មធំទី១១ របស់កម្ពុជា។
កាលពីឆ្នាំ២០២៥ លោក គិត ម៉េង ប្រធានសភាពាណិជ្ជកម្មកម្ពុជា បាននិយាយថា ទំនាក់ទំនងសេដ្ឋកិច្ចរវាងប្រទេសកម្ពុជា និងម៉ាឡេស៊ី គឺមានភាពរឹងមាំជាយូរមកហើយ ដោយទំហំពាណិជ្ជកម្មទំនិញរវាងប្រទេសទាំង ២ បានកើនឡើងជារៀងរាល់ឆ្នាំ។ ម៉ាឡេស៊ីជាអ្នកវិនិយោគដ៏សំខាន់នៅកម្ពុជាតាំងពីទសវត្សរ៍ឆ្នាំ ១៩៩០ ដោយផ្តោតលើវិស័យសំខាន់ៗចំនួន ៤ រួមមាន ទូរគមនាគមន៍ ធនាគារ សំណង់ និង កម្មន្តសាល។
ដើម្បីជំរុញកិច្ចសហប្រតិបត្តិការទ្វេភាគីរវាងប្រទេសទាំង ២ ឱ្យរឹតតែខ្លាំង កាលពីឆ្នាំ២០២៤ ទេសាភិបាលធនាគារជាតិនៃកម្ពុជា និងទេសាភិបាលធនាគារកណ្ដាលម៉ាឡេស៊ី បានចុះអនុស្សរណៈការយល់យោគគ្នា (MoU) ស្តីពីកិច្ចសហប្រតិបត្តិការជំរុញនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ ដើម្បីជំរុញកិច្ចសហប្រតិបត្តិការឱ្យកាន់តែជិតស្និទ្ធ ព្រមទាំងលើកកម្ពស់នវានុវត្តន៍ហិរញ្ញវត្ថុ និងការទូទាត់ឆ្លងដែន ប្រកបដោយប្រសិទ្ធភាព និងសុវត្ថិភាព។ MoU នេះគឺជាការបើកផ្លូវឱ្យកម្ពុជា-ម៉ាឡេស៊ី ធ្វើការទូទាត់ប្រាក់តាមរយៈ QR Code។
ធនាគារជាតិនៃកម្ពុជា បានបញ្ជាក់ថា៖ «ការណ៍នេះនឹងផ្តល់ភាពងាយស្រួលដល់ប្រជាពលរដ្ឋម៉ាឡេស៊ី អាចធ្វើការទូទាត់ដោយស្កេន QR Code នៅប្រទេសកម្ពុជា ហើយប្រជាជនកម្ពុជាក៏អាចធ្វើការទូទាត់ដោយស្កេន QR Code នៅក្នុងប្រទេសម៉ាឡេស៊ីទៅវិញទៅមកផងដែរ ដោយប្រើប្រាស់រូបិយវត្ថុក្នុងស្រុកសម្រាប់ការទូទាត់ ព្រមទាំងបានជួយគាំទ្រដល់យន្តការកិច្ចសហការត្រួតពិនិត្យការទូទាត់ឆ្លងដែន ដើម្បីឱ្យកាន់តែមានប្រសិទ្ធភាព និងសុវត្ថិភាព។ MoU នេះនឹងជួយសម្រួលដល់សកម្មភាពពាណិជ្ជកម្ម និងវិស័យទេសចរណ៍នៃប្រទេសទាំង ២ ផងដែរ»៕
