រដ្ឋបាលរាជធានីភ្នំពេញ អំពាវនាវរកបរិច្ចាគពីសប្បុរសជនដើម្បីឧបត្ថម្ភដល់ជនភៀសសឹក និងកងទ័ពនិងនគរបាលការពារព្រំដែននៅខេត្តព្រះវិហារ និង ស្ទឹងត្រែងសម្រាប់ឱកាសបុណ្យចូលឆ្នាំខ្មែរខាងមុខនេះ។
នៅក្នុងសេចក្ដីអំពាវនាវនៅថ្ងៃទី១៧ មីនានេះ រដ្ឋបាលរាជធានីភ្នំពេញអំពាវនាវការបរិច្ចាគពីឧកញ៉ា ពាណិជ្ជករ សិប្បករ វិនិយោគិន និងសប្បុរសជនទូទៅ ចូលរួមបរិច្ចាគអំណោយជាថវិកា ស្បៀងអាហារ ឬ សម្ភារប្រើប្រាស់ផ្សេងៗ តាមលទ្ធភាពនិងសទ្ធាជ្រះថ្លា ដើម្បីរួមចំណែកកសាងហេដ្ឋារចនាសម្ព័ន្ធយុទ្ធសាស្ត្រ រយៈពេលវែងនៅតាមបន្ទាត់ព្រំដែនជួរមុខ ក្នុងបុព្វហេតុការពារបូរណភាពទឹកដីពីសត្រូវឈ្លានពាន និងការ អភិវឌ្ឍន៍ តាមបន្ទាត់ព្រំដែន។
សាលារាជធានីភ្នំពេញថ្លែងថា ក្រុមការងាររដ្ឋបាលនឹងចុះចែកអំណោយនេះនៅចុងខែមីនា ឬដើមខែមេសា ខាងមុខនេះ ជូនដល់កងយោធពលខេមរភូមិន្ទ ដែលជាសម្ព័ន្ធមេត្រីភាពជាមួយរដ្ឋបាលរាជធានីភ្នំពេញរួមមាន កងពលធំអន្តរាគមន៍លេខ៣ កងពលតូចអន្តរាគមន៍លេខ៩ វរនគរបាល ការពារព្រំដែនលេខ៧៩៣ ឈរជើងការពារនៅខ្សែក្រវាត់ព្រំដែន ប្រចាំទិសប្រាសាទព្រះវិហារ និងកងពលតូច អន្តរាគមន៍លេខ១២៨ ឈរជើងការពារនៅតំបន់អូរអាឡៃ ស្រុកសៀមប៉ាង ខេត្តស្ទឹងត្រែង។
សាលារាជធានីភ្នំពេញស្នើសុំការចូលរួមជាថវិកា ស្បៀងអាហារ និងសម្ភារប្រើប្រាស់ផ្សេងៗ ដើម្បីជាការលើកទឹកចិត្ត និងផ្សារភ្ជាប់នូវមនោសញ្ចេតនាដ៏ជ្រាលជ្រៅ រវាងសមរភូមិជួរក្រោយ និងវីរ យុទ្ធជនតាមបន្ទាត់ព្រំដែនជួរមុខ។
គិតត្រឹមថ្ងៃទី១៧ ខែមីនានេះ នៅមានពលរដ្ឋភៀសសឹកដែលមិនទាន់អាចត្រឡប់ទៅលំនៅឋានវិញជាង ៣ម៉ឺន៥ពាន់នាក់ ដែលបន្តស្នាក់នៅតាមជំរំបណ្ដោះអាសន្ននិងជាមួយសាច់ញាតិបងប្អូន។ នេះបើតាមក្រសួងមហាផ្ទៃ៕
