កម្លាំងជំនាញនៃគណៈបញ្ជាការឯកភាពរដ្ឋបាលរាជធានីភ្នំពេញ បានចុះបង្ក្រាប ទីតាំងលួចលាក់ឆបោកតាមប្រព័ន្ធបច្ចេកវិទ្យាចំនួន២កន្លែង នៅរាជធានីភ្នំពេញ ស្ថិតនៅ ក្នុងសង្កាត់ទួលទំពូងទី១ ខណ្ឌចំការមន និងសង្កាត់ទឹកថ្លា ខណ្ឌសែនសុខ ឃាត់ខ្លួនមនុស្សសរុប ៦៦នាក់។
លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានឲ្យដឹងថា ករណីទី១ សមត្ថកិច្ចបានពិនិត្យឃើញភាពមិនប្រក្រតីនៅជាន់ទី៧ និងជាន់ទី១០ នៃអគារ MSK ស្ថិតក្នុងសង្កាត់ទួលទំពូងទី១ ហើយបានឃាត់ខ្លួនមនុស្សសរុបចំនួន ១៧នាក់ ដែលជាជនជាតិវៀតណាម ក្នុងនោះមាន ៧នាក់ ពុំមានលិខិតឆ្លងដែនជាប់ខ្លួនឡើយ។
សមត្ថកិច្ចរកឃើញវត្ថុតាងដែលពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា រួមមានកុំព្យូទ័រនិងទូរស័ព្ទរាប់សិបគ្រឿង។ សមត្ថកិច្ចសន្និដ្ឋានថា ក្រុមនេះបានធ្វើសកម្មភាពលោងលោមស្នេហា មានគោលដៅច្បាស់លាស់ក្នុងការ "ជំរិតទារប្រាក់ ឬគំរាមកំហែង" ដោយប្រើប្រាស់វីដេអូអាសអាភាសដែលលួចថតបាន ទៅផ្ញើឱ្យក្រុមគ្រួសារ ឬកន្លែងការងាររបស់ជនរងគ្រោះ ដើម្បីបង្ខូចកេរ្តិ៍ឈ្មោះជនរងគ្រោះ ប្រសិនបើជនរងគ្រោះមិនធ្វើតាមការទាមទាររបស់ពួកគេ។
ករណីទី២ សមត្ថកិច្ចបានចុះបង្ក្រាបទីតាំងសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា ស្ថិតនៅអាគារជួល ផ្លូវបេតុង ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយរកឃើញមនុស្សសរុប ៤៩ ក្នុងនោះមាន ១៩នាក់ជាជនជាតិម៉ាឡេស៊ី និង ៣០នាក់ជាជនជាតិឥណ្ឌូនេស៊ី។ សមត្ថកិច្ចបានរកឃើញទូរស័ព្ទចំនួន ១៨៥គ្រឿង និងកុំព្យូទ័រជាច្រើនគ្រឿងទៀត។
ជនសង្ស័យនៃករណីទាំងពីរត្រូវបានបញ្ជូនទៅតុលាការដើម្បីប្រឈមមុខតាមផ្លូវច្បាប់៕
