រដ្ឋាភិបាលជប៉ុន បានសម្រេចផ្តល់ជំនួយហិរញប្បទានឥតសំណងចំនួន ១ ៧០០លានយ៉េន (ប្រមាណ១១លានដុល្លារអាមេរិក)ទៀតជូនកម្ពុជា គាំទ្រដល់មជ្ឈមណ្ឌលសកម្មភាពកំចាត់មីនកម្ពុជា (CMAC) លើគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី៣ បន្ទាប់ពីគម្រោងដំណាក់កាលទី២ បានបញ្ចប់ កាលពីចុងឆ្នាំ ២០២៥ ដោយចំណាយទឹកប្រាក់សរុបអស់ជិត១៧លានដុល្លារអាមេរិក។
ចំពោះពិធីផ្ទេរ-ប្រគល់សមិទ្ធផល នៃគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី២ ត្រូវបានរៀបចំឡើង នៅមណ្ឌលអភិវឌ្ឍន៍ស៊ីម៉ាក់មរតកតេជោ ខេត្តបាត់ដំបង នាថ្ងៃទី ១៨ ខែឧសភានេះ ក្រោមអធិបតីភាពលោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិ និងលោក UENO Atsushi ឯកអគ្គរដ្ឋទូតជប៉ុនប្រចាំកម្ពុជា រួមជាមួយថ្នាក់ដឹកនាំជាច្រើនទៀត។
ជុំវិញការងារទាំងអស់នេះ លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា គូសបង្ហាញតាមរយៈការបង្ហោះសាររបស់លោកថា គម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីនដំណាក់កាលទី២ គឺរដ្ឋាភិបាលជប៉ុនបានសម្រេចផ្តល់ជំនួយហិរញប្បទានឥតសំណងមានទឹកប្រាក់សរុបចំនួន ២ ០០០លានយ៉េន ស្មើនឹងជិត១៧លានដុល្លារអាមេរិក សម្រាប់រយៈពេល៤៥ខែ ចាប់ពីថ្ងៃទី ១ មេសា ឆ្នាំ២០២២ ដល់ថ្ងៃទី ៣១ ធ្នូ ឆ្នាំ២០២៥។
គម្រោងនេះ ត្រូវបានអនុវត្តនៅខេត្តបាត់ដំបង ខេត្តពោធិ៍សាត់ និងខេត្តប៉ៃលិន ព្រមទាំងសម្រេចបានសមិទ្ធផលមានជាអាទិ៍ បោសសម្អាតផ្ទៃដីចម្ការមីន/គ្រាប់បានចំនួន ១២ ០១១ហិកតា ស្មើនឹង១២៧% ធៀបនឹងផែនការ។ រុករកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទចំនួន ២៧ ៨៤៧គ្រាប់ និងផ្ដល់សារអប់រំយល់ដឹងពីមីនបានចំនួន ១២ ៥៨២លើក មានប្រជាពលរដ្ឋចូលរួមសរុបចំនួន ៣៤៣ ២០៩នាក់។
លោកបានបន្ថែមថា ប្រជាពលរដ្ឋចំនួន ៧៦៣ ៦០២នាក់ បានទទួលផលពីគម្រោងដំណាក់កាលទី២នេះ ដោយសាងសង់ផ្លូវគក្រួសក្រហមប្រវែង ៩ ៨០០ម៉ែត្រ និងសំណង់រំដោះទឹកគ្រប់ប្រភេទចំនួន ២៩កន្លែង ទិញសម្ភារបោសសម្អាតមីនមួយចំនួន រួមមានម៉ាស៊ីនរាវមីន ALIS ចំនួន ១២គ្រឿង គ្រឿងចក្របោសសម្អាតមីន Komatsu ចំនួន ១គ្រឿង រថយន្តសណ្តោងចំនួន១ គ្រឿង និងគ្រឿងបន្លាស់ផងដែរ។
ដោយឡែកសម្រាប់គម្រោងថ្មី ដំណាក់កាលទី៣ ដែលត្រូវសម្ពោធបើកការដ្ឋាន នៅថ្ងៃទី ១៨ ខែឧសភានេះ លោក ហេង រតនា បញ្ជាក់ថា មានហិរញ្ញប្បទានឥតសំណង (ពីជប៉ុន) ចំនួន១ ៧០០លានយ៉េន ស្មើនឹងប្រមាណ ១១លានដុល្លារអាមេរិក សម្រាប់រយៈពេល ២៤ខែ ចាប់ពីថ្ងៃទី ១៩ ខែមករា ២០២៦ ដល់ថ្ងៃទី១៨ ខែមករា ឆ្នាំ២០២៨។
ចំពោះគម្រោងថ្មី ដំណាក់កាលទី៣នេះ ដើម្បីគាំទ្រដល់អង្គភាព CMAC លើគោលដៅដូចជា បោសសម្អាតផ្ទៃដីចម្ការមីន/គ្រាប់ចំនួន ៤ ៩៣៩ហិកតា ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ក្នុងខេត្តប៉ៃលិន រួមទាំងជួយសង្គ្រោះជនរងគ្រោះដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច ក៏ដូចជាទិញម៉ាស៊ីនរាវមីន ALIS និងកសាងប្រព័ន្ធទិន្នន័យបញ្ញាសិប្បនិមិ្មត (AI)។
ជាមួយគ្នានេះ លោក ហេង រតនា បានអរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ដែលបានផ្តល់ជំនួយទាំងសម្ភារៈ និងថវិកា ដើម្បីគាំទ្រដល់ CMAC ក្នុងការបោសសម្អាតមីននៅកម្ពុជា ជាពិសេសសរាជរដ្ឋាភិបាលកម្ពុជា ដែលបានផ្តល់ការគាំទ្រយ៉ាងពេញទំហឹងដល់អង្គភាព CMAC។លោក រតនា ក៏បានអរគុណចំពោះដៃគូអភិវឌ្ឍ និងម្ចាស់ជំនួយទាំងអស់ ដែលបានចូលរួមចំណែកក្នុងការអនុវត្តផែនការយុទ្ធសាស្រ្ដរបស់រាជរដ្ឋាភិបាល សំដៅឆ្ពោះទៅរក «កម្ពុជាអស់ការគំរាមកំហែងដោយសារគ្រាប់មីនប្រឆាំងមនុស្សនៅត្រឹមចុងឆ្នាំ ២០៣០ និងកាត់បន្ថយការគំរាមកំហែងដោយសារបញ្ហាសំណល់គ្រាប់យុទ្ធភណ្ឌសង្គ្រាមត្រឹមឆ្នាំ២០៣៥»។
ចំណែកលោក ប្រាក់ សុខុន ក៏បានអរគុណ និងកោតសរសើរដល់គ្រប់ភាគីពាក់ព័ន្ធ ជាពិសេសជប៉ុន ដែលបានផ្តល់ជំនួយដល់កម្ពុជា សម្រាប់គាំទ្រ CMAC នៃគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ទាំងដំណាក់កាលទី២ និងការបើកកិច្ចប្រតិបត្តិការគម្រោងថ្មី ដំណាក់កាលទី៣ ហើយលោកក៏បានរំឭកពីពលិកម្មរបស់អ្នកដោះមីន ដែលបានរងរបួស និងបាត់បង់ជីវិត ក្នុងអំឡុងពេលប្រតិបត្តិការបោសសម្អាតមីនរបស់ពួកគេ។
ជាមួយហេតុផលនេះ លោក ប្រាក់ សុខុន បានបញ្ជាក់ថា៖ «ក្នុងនាមជាប្រទេសដែលរងគ្រោះពីបញ្ហាគ្រាប់មីនធ្ងន់ធ្ងរបំផុតមួយក្នុងពិភពលោក និងជារដ្ឋភាគីនៃអនុសញ្ញាមីនអន្តរជាតិអូតាវ៉ា កម្ពុជា ប្រកាន់ជំហរយ៉ាងម៉ឺងម៉ាត់ក្នុងការបំពេញតាមគ្រប់កាតព្វកិច្ច និងស្មារតីនៃអនុសញ្ញាអន្តរជាតិនេះ ហើយកម្ពុជាក៏មានមោនទនភាព ដែលបានបញ្ជូនកងកម្លាំងបោសសម្អាតមីន និងយុទ្ធភណ្ឌមិនទាន់ផ្ទុះ ចូលរួមបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ»។
ជាមួយគ្នានេះ លោកឧបនាយករដ្ឋមន្ត្រី បានថ្លែងអំណរគុណដល់ដៃគូអ្នកផ្តល់ជំនួយផ្សេងៗទៀត ដែលបាន ហើយនឹងបន្តជួយឧបត្ថម្ភគាំទ្រដល់សកម្មភាពបោសសម្អាតមីននៅកម្ពុជា ក្នុងនោះក្រៅពីជប៉ុន គឺមានចិន សហរដ្ឋអាម៉េរិក អូស្ត្រាលី ប៊ែលហ្ស៊ិក កាណាដា សហគមន៍អឺរ៉ុប អាល្លឺម៉ង់ ន័រវេស្ស ស៊ុយអ៊ែត ចក្រភពអង់គ្លេស និងអង្គការជាដៃគូរួមមាន UNDP អង្គការ NPA ទីភ្នាក់ងារ JICA អង្គការយេម៉ាស់ (JMAS) អង្គការ អាប៉ូប៉ូ (APOPO) អង្គការ Golden West, Japan International Cooperation System ក្រុមហ៊ុន Japan Crown Agents Japan Limited ក្រុមហ៊ុន Komatsu និងក្រុមហ៊ុន Nikken Corporation៕
