លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ បានដាក់បទបញ្ជាដល់កងកម្លាំងចម្រុះ ឱ្យការពារ ទប់ស្កាត់ និងបង្ក្រាបបទល្មើសកាប់ទន្ទ្រានព្រៃឈើ ក្នុងតំបន់ដែនជម្រកសត្វព្រៃ ព្រៃឡង់ ក្នុងភូមិសាស្ត្រស្រុកសណ្ដាន់ ខេត្តកំពង់ធំ ជាប់ព្រំប្រទល់ ស្រុកសំបូរ ខេត្តក្រចេះ ឱ្យបានដាច់ខាត ដើម្បីកសាងសំណុំរឿងបញ្ជូនជនល្មើសទៅកាន់តុលាការផ្ដន្ទាទោសតាមផ្លូវច្បាប់ឱ្យបានធ្ងន់ធ្ងរ។
ការដាក់បទបញ្ជានេះ ត្រូវបានធ្វើឡើងក្នុងកិច្ចប្រជុំកងកម្លាំងចម្រុះ នៅទីបញ្ជាការតំបន់ប្រតិបត្តិការសឹករងកំពង់ធំ កាលពីថ្ងៃទី ១៨ ខែឧសភា ដោយមានថ្នាក់ដឹកនាំកងកម្លាំងប្រដាប់អាវុធ មន្ត្រីស្ថាប័នពាក់ព័ន្ធ និងអាជ្ញាធរដែនដីជាច្រើនបានចូលរួម ហើយនេះជាការអនុវត្តតាមបទបញ្ជារបស់លោក នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ។
នៅក្នុងកិច្ចប្រជុំនោះ លោក សោម ស៊ុន បានថ្លៃអំណរគុណដល់កងកម្លាំងចម្រុះទាំងអស់ ដែលបានខិតខំប្រឹងប្រែងបំពេញភារកិច្ចប្រកបដោយស្មារតីទទួលខុសត្រូវខ្ពស់ ក្នុងភារកិច្ចការពារធនធានធម្មជាតិ ពិសេសការការពារដែនជម្រកសត្វព្រៃ ព្រៃឡង់ នាពេលកន្លងទៅ ទោះបីជាមានការខូចខាតខ្លះនៅកន្លែងមួយចំនួន ប៉ុន្តែជារួមកងកម្លាំងចម្រុះរបស់យើងគ្រប់គ្រងថែរក្សាបាន តំបន់ព្រៃឡង់ក្នុងភូមិសាស្ត្រខេត្តកំពង់ធំ។
យ៉ាងណាក៏ដោយ សោម ស៊ុន បានប្រគល់ភារកិច្ច និងដាក់បទបញ្ជាដល់កងកម្លាំងចម្រុះ ត្រូវធ្វើការកែសម្រួល និងបង្កើនបន្ថែមទីតាំងឈរជើងថ្មីមួយកន្លែងទៀត នៅតំបន់អូដូង ជាប់ព្រំប្រទល់ខេត្តកំពង់ធំ និងខេត្តក្រចេះ ដើម្បីធានាប្រសិទ្ធភាព ក្នុងការធ្វើសកម្មភាព និងការពារ ទប់ស្កាត់ មិនឱ្យមានការកាប់ទន្ទ្រានព្រៃឈើ នៅតំបន់ដែនជម្រកសត្វព្រៃ ព្រៃឡង់ ជាថ្មីទៀតជាដាច់ខាត។
ជាមួយគ្នានេះ លោកបានស្នើទៅសមត្ថកិច្ចជំនាញ ត្រូវអនុវត្តយ៉ាងម៉ឺងម៉ាត់ តាមបទបញ្ជារបស់លោក នួន ផារ័ត្ន ក្នុងការរៀបចំដី ការដកហូតដីព្រៃ ដែលបានកាប់ទន្ទ្រាននាពេលកន្លងទៅ ដើម្បីដាក់ជាសម្បត្តិរដ្ឋ និងបន្តស្រាវជ្រាវរកមុខសញ្ញាជនល្មើស ដើម្បីកសាងសំណុំរឿងបញ្ជូនទៅកាន់តុលាការផ្ដន្ទាទោសតាមផ្លូវច្បាប់ឱ្យបានធ្ងន់ធ្ងរបំផុត។
លោកបានបញ្ជាក់ថា៖ «ចំពោះកងកម្លាំងចម្រុះ ដែលត្រូវបានកែសម្រួលទៅឈរជើងនៅទីតាំងថ្មី ត្រូវធ្វើសកម្មភាពឱ្យបានជាប់ជាប្រចាំ ដើម្បីឃ្លាំចាំមើល និងចាប់ឃាត់ខ្លួនជនប្រព្រឹត្តបទល្មើសជាក់ស្ដែងក្នុងការកាប់ទន្ទ្រានព្រៃឈើក្នុងដែនជម្រកសត្វព្រៃ ព្រៃឡង់ ដើម្បីបញ្ជូនទៅកាន់តុលាការអនុវត្តតាមវិធានការច្បាប់ឱ្យបានម៉ឺងម៉ាត់បំផុត»។
តាមរបាយការណ៍របស់ លោក ណុប ឆៃយ៉ា អនុប្រធានមន្ទីរបរិស្ថានខេត្ត និងជាប្រធានទីបញ្ជាការស្រាលបង្ក្រាបបទល្មើសធនធានធម្មជាតិ នៅតំបន់អូរឃ្មង ក្នុងឃុំសុចិត្រ ស្រុកសណ្ដាន់ បានឱ្យដឹងពីស្ថានភាពគ្រប់គ្រងតំបន់ដែនជម្រកសត្វព្រៃ ព្រៃឡង់ ក្នុងឃុំសុចិត្រ ស្រុកសណ្ដាន់ ដោយកន្លែងមួយចំនួន ត្រូវរងការកាប់ទន្ទ្រានពីជនល្មើស ស្ថិតនៅក្នុងតំបន់អូដូង និងតំបន់អូកង់ ដែលមានព្រំប្រទល់ជាប់ខេត្តក្រចេះ ហើយតំបន់នេះ កងកម្លាំងចម្រុះ ធ្លាប់បានចាប់ឃាត់ខ្លួនជនល្មើសកាប់ទន្ទ្រានព្រៃឈើ បញ្ជូនទៅកាន់តុលាការផ្តន្ទាទោសរួចមកហើយ។
ជាមួយគ្នានេះ លោក គង់ វ៉ាន់ មន្ត្រីឧទ្យានុរៈនៃមន្ទីរបរិស្ថានខេត្តកំពង់ធំ បានបញ្ជាក់អំពីស្ថានភាពនៃការគ្រប់គ្រង និងការរៀបចំកែសម្រួលទីតាំងឈរជើងរបស់ទីបញ្ជាការស្រាល ដើម្បីការពារតំបន់ព្រៃឡង់នេះឱ្យបាន៕
