ប្រជាពលរដ្ឋគ្រប់រូប ដែលគេចវេះពីកាតព្វកិច្ចយោធា ប្រឈមមុខជាប់ពន្ធនាគារចន្លោពី ៦ខែ ទៅ២ឆ្នាំ និងពិន័យជាប្រាក់ពី ១លានរៀល ដល់ ៤លានរៀល ចំណែកអ្នកគេចវេះ ក្នុងកាលៈទេសៈប្រទេសមានសង្គ្រាមឬរងការឈ្លានពានពីបរទេស និងត្រូវជាប់ពន្ធនាគាររហូតដល់ ៥ឆ្នាំ។
ការកំណត់នេះនឹងធ្វើឡើងដោយផ្អែកតាមលក្ខខណ្ឌមួយចំនួនដែលមានចែងនៅក្នុងច្បាប់ស្ដីពីកាតព្វកិច្ចយោធា ដែលត្រូវបានប្រមុខរដ្ឋស្ដីទី លោក ហ៊ុន សែន ប្រកាសដាក់ឲ្យប្រើនៅថ្ងៃទី២៣ ខែឧសភា ហើយត្រូវបានផ្សព្វផ្សាយនៅថ្ងៃនេះ ដោយចាត់ទុកជាការប្រញាប់។
ច្បាប់កាតព្វកិច្ចយោធា តម្រូវឲ្យប្រជាពរលដ្ឋខ្មែរអាយុពី ១៨ ដល់ ២៥ឆ្នាំ ចូលរួមបំពេញកាតព្វកិច្ចរយៈពេល ២ឆ្នាំ និងបន្តជាយោធិនបម្រុងរហូតដល់អាយុ ៤៥ឆ្នាំ។ ប៉ុន្តែ រយៈពេល ២ឆ្នាំនៃការហ្វឹកហាត់អាចត្រូវបានបន្ថែម៦ខែទៀតទៅតាមភាពចាំបាច់ជាក់ស្ដែង។ នេះបើយោងតាមច្បាប់ដដែល។ យ៉ាងណាក៏ដោយ ស្ត្រីអាចូលរួមដោយគោលការណ៍ស្ម័គ្រចិត្ត។
យោងតាមច្បាប់នេះ នៅពេលពលរដ្ឋមានអាយុ ១៧ឆ្នាំ ពួកគេត្រូវទៅចុះឈ្មោះក្នុងបញ្ជីជំរឿនកាតព្វកិច្ចយោធា បន្ទាប់មកពួកគេនឹងទទួលបានព័តមានអំពីការចុះឈ្មោះដើម្បីបំពេញកាតព្វកិច្ចយោធា។ យ៉ាងណាក៏ដោយ អ្នកជាប់កាតព្វកិច្ចអាចដាក់ពាក្យសុំពន្យារពេល ១ឆ្នាំម្ដង។
ចំពោះពលរដ្ឋដែលបានចុះបញ្ជីហើយ ហើយត្រូវបានអញ្ជើញមកបំពេញកាតព្វកិច្ច ប៉ុន្តែបែរជាខកខានមិនបានមកតាមការកោះអញ្ជើញរយៈពេល ៣០ថ្ងៃ នឹងត្រូវប្រឈមមុខជាប់ពន្ធនាគារនិងពិន័យ ដោយច្បាប់នេះកំណត់ថា អំពើបែបនេះគឺជាការគេចវេះពីការបំពេញកាតព្វកិច្ច។ នេះបើយោងតាមមាត្រា ១៣។
ប៉ុន្តែបើការគេចវេះនេះធ្វើឡើងក្នុងកាលៈទេសៈដែលប្រទេសមានសង្គ្រាមឬរងការឈ្លានពានពីបរទេស ទោសទណ្ឌនេះនឹងកើនឡើង ដោយរយៈពេលកំណត់នៃការជាប់ពន្ធនាគារមានចន្លោះពី ២ឆ្នាំទៅ ៥ឆ្នាំ ហើយការផាកពិន័យនឹងមានចន្លោះពី ៤លានរៀល ទៅ១០លានរៀល។
ចំពោះអ្នកដែលបានមកបំពេញកាតព្វកិច្ចហើយ ប៉ុន្តែ បែរជាគេចវេះនៅក្នុងកាលៈទេសៈមានសង្គ្រាមឬមានការឈ្លានពាន ក៏នឹងត្រូវរងទោសទណ្ឌដូចគ្នានេះដែរ។
មាត្រា ១៣ ដដែល ចែងបន្តថា៖ «ក្នុងករណីជនល្មើសទទួលកំហុសរបស់ខ្លួន ហើយសុខចិត្តចូលមកបំពេញកាតព្វកិច្ចយោធាវិញនៅមុនពេល ដែលមានសេចក្តីសម្រេចជាស្ថាពរពីតុលាការ ជននោះត្រូវទទួលបានការអនុគ្រោះពីការផ្តន្ទាទោស ប៉ុន្តែ ត្រូវបញ្ជូនជននោះទៅអនុវត្តទណ្ឌកម្មវិន័យ។ បែបបទនិងនីតិវិធីនៃការអនុវត្តទណ្ឌកម្មវិន័យ ត្រូវកំណត់ដោយ ប្រកាសរបស់រដ្ឋមន្ត្រីក្រសួងការពារជាតិ»។
អ្នកដែលញុះញង់ឲ្យអ្នកណាម្នាក់គេចវេះពីការបំពេញកាតព្វកិច្ចយោធា ត្រូវផ្តន្ទាទោសដូចគ្នានឹងបទល្មើសគេចវេះពី កាតព្វកិច្ចយោធា ដូចមានចែងក្នុងមាត្រា១៣ នៃច្បាប់នេះ។ ទោសទណ្ឌនេះក៏ត្រូវអនុវត្តដូចគ្នាចំពោះអ្នកផ្តើមគំនិតឬសមគំនិតនៃបទល្មើស។
មាត្រា ១៥ ចែងថា៖ «ជនណាដែលឆ្លៀតយកឋានៈនិងតួនាទី ដើម្បីរាំងស្ទះមិនឱ្យប្រជាពលរដ្ឋចូលបំពេញកាតព្វកិច្ចយោធា ត្រូវផ្តន្ទាទោសដាក់ពន្ធនាគារពី ២ (ពីរ) ឆ្នាំ ទៅ ៥ (ប្រាំ) ឆ្នាំ និងពិន័យជាប្រាក់ពី ៤ ០០០ ០០០ (បួនលាន) រៀល ទៅ ១០ ០០០ ០០០ (ដប់លាន) រៀល»។
ចំណែកមាត្រា ១៧ ចែងអំពីទោសបន្ថែម ដែលអាចអនុវត្តបាននៅក្នុងច្បាប់ព្រហ្មទណ្ឌផ្សេងទៀត ក្នុងករណីដែលអំពើដែលកំណត់ថាជាបទល្មើសដែលមានចែងក្នុងច្បាប់នេះ ជាបទល្មើសដែលបានបញ្ញត្ត ក្នុងច្បាប់ព្រហ្មទណ្ឌផ្សេងទៀត៕
