ត្រឹមតែជាងមួយសប្តាហ៍ប៉ុណ្ណោះ បន្ទាប់ពីកម្មកររោងចក្រចំនួន ១៤ នាក់បានបាត់បង់ជីវិតក្នុងគ្រោះថ្នាក់ចរាចរណ៍ពីរដាច់ដោយឡែកពីគ្នា គ្រោះមហន្តរាយបានកើតឡើងម្តងទៀត។ រថយន្តឈ្នួលដឹកកម្មករមួយគ្រឿងបានក្រឡាប់នៅក្នុងខេត្តស្វាយរៀង កាលពីម្សិលមិញ ថ្ងៃទី៤ ខែមិថុនា បណ្តាលឱ្យមនុស្ស ២៧ នាក់រងរបួស ដែលក្នុងនោះខ្លះរងរបួសធ្ងន់។
អ្នកជំនាញផ្នែកសុវត្ថិភាពចរាចរណ៍ផ្លូវគោកដ៏លេចធ្លោម្នាក់ បានលើកឡើងពីមូលហេតុដែលគ្រោះថ្នាក់ទាំងនេះនៅតែបន្តផ្តាច់យកជីវិតមនុស្ស ជាពិសេសកម្មករកម្មការិនី និងអ្វីដែលគួរធ្វើដើម្បីបង្ការកុំឱ្យមានហេតុការណ៍បែបនេះបន្តកើតមានទៀត។
យោងតាមលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា គ្រោះថ្នាក់កាលពីម្សិលមិញបានកើតឡើងនៅភូមិថ្មី ឃុំស្វាយចេក ក្នុងស្រុករំដួល ខេត្តស្វាយរៀង។
លោកថា បញ្ហាប្រព័ន្ធហ្វ្រាំងរថយន្ត គឺជាមូលហេតុដែលធ្វើឱ្យរថយន្តក្រឡាប់ និងបណ្តាលឱ្យមនុស្ស ២៧ នាក់រងរបួស ដែលក្នុងនោះ ៥ នាក់រងរបួសធ្ងន់។ លោកបន្ថែមថា មន្ត្រីមកពីក្រសួងការងារ និងបេឡាជាតិរបបសន្តិសុខសង្គម (ប.ស.ស.) កំពុងសហការដើម្បីជួយដល់អ្នករងរបួស។
លោក ស៊ុន មេសា បានអំពាវនាវដល់អ្នកបើកបរទាំងអស់ឱ្យគោរពច្បាប់ចរាចរណ៍ និងត្រួតពិនិត្យបច្ចេកទេសយានយន្តរបស់ខ្លួនឱ្យបានទៀងទាត់។
លោកនិយាយថា៖ «កុំឱ្យកម្មករដែលជាអ្នកប្រើប្រាស់សេវាបន្តក្លាយជាជនរងគ្រោះ»។
កាលពីថ្ងៃទី២៣ ខែឧសភា គ្រោះថ្នាក់ចរាចរណ៍មួយបានកើតឡើងនៅខេត្តស្វាយរៀង បណ្តាលឱ្យស្លាប់ ៥ នាក់ និងរបួសជាង ៣០ នាក់។ ក្នុងថ្ងៃដដែលនោះ គ្រោះថ្នាក់មួយទៀតកើតឡើងនៅខេត្តកំពង់ឆ្នាំង បានបណ្តាលឱ្យស្លាប់ ៩ នាក់ និងរបួសជាង ៤០ នាក់។
បើតាមលោក ស៊ុន មេសា កម្មករភាគច្រើនដែលរងរបួសក្នុងគ្រោះថ្នាក់កាលពីថ្ងៃទី២៣ ឧសភា បានជាសះស្បើយ និងចេញពីមន្ទីរពេទ្យហើយ ប៉ុន្តែមាន ១២ នាក់ទៀតកំពុងបន្តសម្រាកព្យាបាលនៅឡើយ។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP Foundation) បានពន្យល់ថា គ្រោះថ្នាក់ចរាចរណ៍ពាក់ព័ន្ធនឹងកម្មកររោងចក្រមានពីរប្រភេទ។ ប្រភេទទី១ គឺគ្រោះថ្នាក់ពាក់ព័ន្ធនឹងសេវាដឹកជញ្ជូនដែលកម្មករប្រើប្រាស់ច្រើន ដូចជាឡានដឹកទំនិញដែលកែច្នៃសម្រាប់ដឹកកម្មករ និងរ៉ឺម៉កជាដើម។ ប្រភេទទី២ គឺកម្មករដែលធ្វើដំណើរតាមមធ្យោបាយផ្ទាល់ខ្លួន ដែលភាគច្រើនជាម៉ូតូ ឬពេលខ្លះមានកង់ផងដែរ។
លោកបានលើកឡើងពីកត្តាបីដែលគួរឱ្យបារម្ភសម្រាប់មធ្យោបាយដឹកជញ្ជូនប្រភេទទី១ ដែលរួម កត្តាអ្នកបើកបរ កត្តាយានយន្ត និងកត្តាស្ថានភាពផ្លូវ។ លោកបានផ្តល់អនុសាសន៍ថា ឡានដឹកកម្មករមិនគួរជាឡានដែលកម្មករឈរជិះដើម្បីធ្វើដំណើរនោះទេ ព្រោះការឈរអាចបណ្តាលឱ្យឡានក្រឡាប់បានយ៉ាងងាយ។ បន្ថែមពីលើនេះ អ្នកបើកបរឡានដឹកកម្មករត្រូវតែមានប័ណ្ណបើកបរ និងបើកបរយានយន្តឱ្យត្រូវតាមប្រភេទប័ណ្ណបើកបររបស់ខ្លួន។
ចំពោះគ្រោះថ្នាក់ប្រភេទទី២ ពាក់ព័ន្ធនឹងម៉ូតូវិញ លោកបានផ្តល់យោបល់ឱ្យកម្មករទទួលបានការបណ្តុះបណ្តាលអំពីការបើកបរ និងត្រូវពាក់មួកសុវត្ថិភាពជានិច្ច។
លោក គឹម បញ្ញា បានផ្តល់យោបល់ថា នៅពេលដែលរដ្ឋាភិបាលកំពុងធ្វើវិសោធនកម្មច្បាប់ចរាចរណ៍ផ្លូវគោក ច្បាប់ថ្មីគួរតែគ្របដណ្តប់លើទិដ្ឋភាពបន្ថែមទៀតពាក់ព័ន្ធនឹងអ្នកបើកបរ រួមទាំងរថយន្តដឹកកម្មករផងដែរ។
យ៉ាងណាក៏ដោយ លោកបានបញ្ជាក់ថា ការបើកបរហួសល្បឿនកំណត់គឺជាមូលហេតុចម្បងនៃគ្រោះថ្នាក់។
លោកថ្លែងថា៖ «អ្វីដែលយើងត្រូវធ្វើជាបន្ទាន់នោះខ្ញុំគិតថា គឺការត្រួតពិនិត្យល្បឿន និងគ្រប់គ្រងលំហូរចរាចរណ៍នៅតំបន់រោងចក្រ ជាពិសេសនៅពេលព្រឹកពីម៉ោង ៦ ដល់ ៧ ព្រឹក និងពេលល្ងាចពីម៉ោង ៤ ដល់ ៦ ល្ងាច ដោយមាននគរបាលចរាចរណ៍ ឬអាជ្ញាធរជួយប្រចាំការ។ ទី២ យើងក៏គួរប្រើប្រាស់កោណចរាចរណ៍ ឬភ្លើងសញ្ញាចរាចរណ៍ ដើម្បីគ្រប់គ្រងចរាចរណ៍នៅក្បែររោងចក្រ ដែលវានឹងជួយកាត់បន្ថយល្បឿនបើកបរ គឺដូចយើងដាក់នៅតាមទីតាំងមានសាលារៀន»។
លោក គឹម បញ្ញា ក៏បានផ្តល់អនុសាសន៍ឱ្យពិចារណាឡើងវិញនូវការកំណត់ល្បឿននៅតំបន់រោងចក្រ ដោយលោកបានលើកយក ផ្លូវជាតិលេខ ៥ ក្នុងខេត្តកំពង់ឆ្នាំង ជាឧទាហរណ៍។ លោកថា ផ្លូវជាតិលេខ ៥ ទើបត្រូវបានកែលម្អថ្មីយ៉ាងល្អ ប៉ុន្តែល្បឿនកំណត់នៅកន្លែងចង្អៀត ឬ សម្បូររោងចក្រមខ្លះនៅតែ ៩០ គីឡូម៉ែត្រក្នុងមួយម៉ោង។ ហេតុដូច្នេះលោកស្នើឲ្យមន្ត្រីដែលធ្វើការពាក់ព័ន្ធនឹងល្បឿនកែសម្រួលល្បឿនកំណត់ឡើងវិញទៅតាមស្ថានភាពនៃទីតាំងចាំបាច់៕
