លោក ស សុខា រដ្ឋមន្ត្រីក្រសួងមហាផ្ទៃ បានប្រាប់ឱ្យអាជ្ញាធរឲ្យបង្ក្រាបការនាំចូលទំនិញ និងម្ហូបអាហារខុសច្បាប់ ជាពិសេសពីប្រទេសថៃ ខណៈដែលទំនិញដែលត្រូវបានហាមឃាត់នៅតែត្រូវបានបង្ក្រាបរឹបអូសបានជាបន្តបន្ទាប់។
ថ្លែងក្នុងពិធីបិទសន្និបាតបូកសរុបលទ្ធផលការងាររបស់ក្រុមប្រឹក្សាឃុំ សង្កាត់ នៅថ្ងៃទី៨ ខែកញ្ញានេះ លោកឧបនាយករដ្ឋមន្ត្រីបានថ្លែងថា មានអាហារហួសសុពលភាពជាច្រើនប្រភេទត្រូវបានរកឃើញថាដឹកជញ្ជូនដោយខុសច្បាប់ពីប្រទេសថៃមកកម្ពុជាតាមរយៈប្រទេសឡាវ។
លោកបានថ្លែងថា៖ «ខ្ញុំបានផ្ញើសារទៅកាន់ខេត្តជាប់ព្រំដែន ដើម្បីឱ្យផ្តោតការយកចិត្តទុកដាក់មិនត្រឹមតែលើគ្រឿងញៀនប៉ុណ្ណោះទេ ប៉ុន្តែថែមទាំងលើទំនិញប្រើប្រាស់ និងម្ហូបអាហារផងដែរ។ ផលិតផលខ្លះមកពីថៃតាមរយៈឡាវ ដោយប្រើការវេចខ្ចប់បន្លំភ្នែក។ ផលិតផលដើមគឺហួសសុពលភាព ប៉ុន្តែវាត្រូវបានខ្ចប់ជាភាសាឡាវវិញ»។
លោកបន្តថា៖ «កាលពីម្សិលមិញ មានព័ត៌មានថាសាច់ជ្រូកដែលហួសសុពលភាពអស់រយៈពេលមួយឆ្នាំបានចូលមកកម្ពុជា។ សមត្ថកិច្ចនៅព្រំដែនថៃគ្មានជម្រើសអ្វីក្រៅពីអនុវត្តច្បាប់ចំពោះអ្នកពាក់ព័ន្ធនោះទេ។ យើងមិនអាចអនុញ្ញាតឱ្យមានរឿងនេះទេ វាដូចជាការយកមេរោគ ឬជំងឺឱ្យប្រជាពលរដ្ឋយើងហូបដូច្នោះដែរ។ ទោះបីជាវាមើលទៅដូចជារឿងតូចតាច ប៉ុន្តែបើវាហួសសុពលភាព យើងត្រូវតែគ្រប់គ្រងវា»។
បន្ថែមលើវិធានការសុខភាព ការនាំចូលម្ហូបអាហារ បន្លែ ផ្លែឈើ និងប្រេងឥន្ធនៈ ក៏ដូចជាមុខទំនិញមួយចំនួនទៀត ត្រូវបានកំណត់ថាខុសច្បាប់ ចាប់តាំងពីមានជម្លោះព្រំដែនកាលពីឆ្នាំមុន៕
