លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា បានលើកឡើងថា អាជ្ញាធរបានរកឃើញការកើនឡើងនូវចំនួនពលរដ្ឋខ្មែរដែលពាក់ព័ន្ធនឹងប្រតិបត្តិការឆបោកតាមប្រព័ន្ធបច្ចេកវិទ្យា ជាពិសេសនៅក្នុងខេត្តព្រះសីហនុ ដែលថ្មីៗនេះពលរដ្ឋខ្មែរជាង ៨០ នាក់ ត្រូវបានរកឃើញថាធ្វើការនៅក្នុងទីតាំងខុសច្បាប់តែមួយ។
លោកបន្តថា ប្រតិបត្តិការទាំងនេះកំពុងផ្លាស់ប្តូរទីតាំងទៅកាន់ព្រំដែនកម្ពុជា-វៀតណាម និងនៅតាមបុរីមួយចំនួនក្នុងរាជធានីភ្នំពេញ ខណៈដែលរាជរដ្ឋាភិបាលកំពុងបង្កើនការរឹតបន្តឹងលើការបង្ក្រាប។
ថ្លែងក្នុងពិធីបិទសន្និបាតបូកសរុបលទ្ធផលការងាររបស់ក្រុមប្រឹក្សាឃុំ សង្កាត់ អាណត្តិបច្ចុប្បន្ន មុនការបោះឆ្នោតឆ្នាំក្រោយ លោក ស សុខា បានពន្យល់ពីរបៀបដែលពលរដ្ឋខ្មែរត្រូវបានជ្រើសរើសឱ្យចូលរួមក្នុងប្រតិបត្តិការឆបោកអនឡាញ។
លោកបានថ្លែងថា៖ «ពលរដ្ឋខ្មែរទាំងនេះមិនចាំបាច់ធ្វើអ្វីច្រើនទេ ពួកគេត្រូវបានគេឱ្យលេខទូរស័ព្ទប្រហែល ១០,០០០ លេខក្នុងមួយថ្ងៃ ដើម្បីទូរស័ព្ទ ឬផ្ញើសារ។ នៅពេលមានអ្នកឆ្លើយតប ពួកគេគ្រាន់តែបញ្ជូនលេខដែលអាចទាក់ទងបានទាំងនោះទៅឱ្យមេម្នាក់ទៀត។ ដោយគ្រាន់តែធ្វើបែបនេះ ពួកគេទទួលបានប្រាក់កម្រៃជាង ៦០០ ដុល្លារក្នុងមួយខែ អីចឹងទើបពួកគេធ្វើវា»។
លោកបន្តថា ជាដំបូង ក្រុមឆបោកទាំងនេះ ធ្វើជានុយ។ នៅពេលដែលមានអតិថិជនជាប់អន្ទាក់ គេនឹងបញ្ជូនលេខនោះទៅឱ្យមេកម្រិតខ្ពស់ ដើម្បីចាប់ផ្តើមល្បិចបោកប្រាស់ ដូចជាការវិនិយោគក្លែងក្លាយ ស្នេហាក្លែងក្លាយ ឬការផ្ដល់ឱកាសការងារបោកប្រាស់ជាដើម ដែលសុទ្ធតែក្លែងក្លាយ។
លោក ស សុខា ក៏បានពន្យល់ផងដែរថា សូម្បីតែជនជាតិអូស្ត្រាលី ក៏ធ្លាក់ក្នុងអន្ទាក់នៃក្រុមឆបោកទាំងនេះដែរ។
លោកលើកឡើងថា៖ «ដូចដែលខ្ញុំបានលើកឡើង ឱកាសការងារទាំងនេះទាក់ទាញមនុស្សគ្រប់គ្នា សូម្បីតែជនជាតិអូស្ត្រាលីម្នាក់ក៏ចង់មកធ្វើការនៅកម្ពុជាដែរ ដោយសារតែប្រាក់ខែខ្ពស់ដែលគេសន្យា។ មុខសញ្ញានៃការឆបោក និងការទាក់ទាញការងារនៅក្នុងព្រះរាជាណាចក្រកម្ពុជាយើង គឺមិនប្រកាន់សញ្ជាតិនោះទេ»។
បន្ថែមលើការជំរុញឲ្យអាជ្ញាធរបង្ក្រាបការឆបោក លោក ស សុខា ក៏បានណែនាំឱ្យអាជ្ញាធរមូលដ្ឋានយកចិត្តទុកដាក់ខ្ពស់លើការប្រយុទ្ធប្រឆាំងគ្រឿងញៀន ខណៈបរិមាណគ្រឿងញៀនដែលរឹបអូសបានមានការកើនឡើង។
លោកបានរំឭកពីការសម្រេចចិត្តរបស់អតីតរដ្ឋមន្ត្រីក្រសួងមហាផ្ទៃ លោក ស ខេង ដែលធ្លាប់ផ្ដល់រង្វាន់ដល់នគរបាលប្រឆាំងគ្រឿងញៀនចំនួន ១០,០០០ ដុល្លារ សម្រាប់ការបង្ក្រាបបានគ្រឿងញៀនសុទ្ធ ១ គីឡូក្រាម។
ដោយសារបរិមាណគ្រឿងញៀនមានចំនួនច្រើន លោក ស សុខា បានបញ្ជាក់ថា លោកបានសម្រេចចិត្តថ្មី ដោយកាត់បន្ថយទឹកប្រាក់រង្វាន់មកត្រឹម ១០ លានរៀលវិញ សម្រាប់ការរឹបអូសគ្រឿងញៀន ១ គីឡូក្រាម ហើយការសម្រេចនេះក៏ទទួលបានការយល់ព្រមពីលោកនាយករដ្ឋមន្ត្រី ហ៊ុន ម៉ាណែត ផងដែរ៕
